Gaztelugatxeko San Juan
Magia duen lekua da Gaztelugatxe. Itsasoaren eta lurraren borrokak sortutako irla naturala dugu, mendeetan zizelkatutako arku eta kobaz osatutakoa. Haitz gaineko gaztelua da, hortik izena.
Kostaldeko leku zoragarri hau bisitatzeko kontuan izan:
- Gune hau biotopoa da, beraz, bertako aberastasun ekologikoa zaintzea guztion ardura da.
- Gaztelugatxeko San Juan bisitatzeko, modu bi daude: batetik, ASTE SANTUAN, UZTAILEAN ETA ABUZTUAN, Gaztelugatxe hobeto ezagutzeko; autobus eta gida batekin joateko aukera duzu, honela ez duzu tiketaren ardurarik eduki behar, online erreserba egiterakoan zerbitzu guztiak daude barne: erosi zure tiketa hemen.
Bizitatzeko beste modua: zure kabuz joan nahi izanez gero, gogoratu goi sasoian, jai egunetan eta zubietan aurretiaz erreserba egin behar dela: www.bizkaia.eus/eu/gaztelugatxe - Gaztelugatxera ez joan kotxez, utzi zure kotxea Bermeon, eta garraio publikoan bertaratu zaitezkete.
- Norberaren osasun neurriak ezagutzea komeni da, ibilbide honek esfortzu fisikoa eskatzen du. Ez ahaztu oinetako egokiak eta ura eramaten…
- Eguerdiko orduak jendetsuenak dira, batez ere uda sasoian eta jai egunetan.
- Itsasoz bisitatu nahi duzu inguru hau? Bermeotik ateratzen dira itsasontziak: Itsasoko jarduerak
- Meza egunak: ekainaren 24, uztailaren 31, abuztuaren 29 eta abenduaren 30.
- San Juaneko oroigarri bat nahi izanez gero, Bermeoko Gaztelugatxe gozotegian, eskatu San Juanen Oinatzak.
- Urpean Lucariniren Begoñako Andra Mariren irudia dago. Urpekaria ez bazara, Bermeoko San Frantzisko Eleizan dago erreplika bat.
Itsasoak ur azpian kolorez beteriko arrezifeak eta Begoñako Ama Birjinaren irudia ditu. Gotorleku izan da hainbat batailatan, Gaztelako koroaren aurka erresistentzian edota kortsarioen erasoen aurrean, adibidez. Era berean, Erdi Arotik erlijio ohituren eta sinesmenen erreferente ere badugu.
Euskal kostaldeko peregrinazio leku jendetsuena dugu eta erromesaldi egunik handiena ekainaren 24a izaten da.
Gehienak egunpasa etortzen dira, baina badira oraindino promesak betetzera edota santuari eskerrak ematera datozenak.
Gaztelugatxeko erlijio errituak itsasoari lotutakoak dira eta ermita barruan hainbat eskaintza daude zintzilik: itsasontzien maketak, pinturak, argazkiak… Marinelek eta arrantzaleek ontzia itsasoko arriskuetatik babestearren santuari eskerrak emateko egin ohi dituzten ofrendak dira.
Hegaluzearen kostera hasieran, arrantzaleak eta neskatilak Gaztelugatxera joaten dira, Santuari osasuna, eguraldi ona eta arrain asko eskatzera. Eskaera errituak itsasotik ere egiten dira eta arrantzaleek itsasontziak Gaztelugatxe ingurura ekartzen dituzte “eginbeharrak” egitera: hiru buelta ababorrera eta hiru istriborrera. Batzuk San Joan belarren sorta ere botatzen dute kubiertatik, zartagin batean erre ostean. XXI. mendeko atun-ontzi punteroenek ere, teknologia berritzaileena instalatu eta kontrolik zorrotzenak pasatu ostean, hona datoz erritua egitera, Tropikora arrantzara abiatu aurretik.
241 harrizko eskailera igo behar dira Gaztelugatxe goraino heltzeko. Kondairak dioenez, santuak hiru pausu baino ez zituen behar izan Bermeotik ermitaraino ailegatzeko. Ikusi duzu haitz gaineko oinatz marka? Bermeoko harresiaren Sanjuanportalen dago lehenengoa eta diotenez, hemen eta han oina sartzen duenak, oinetan kailurik ez du izango urte osoan.
Akatz Uhartea
Ibilbideak
Paisaia paregabe eta altxor arkitektonikoak barnebiltzen dituzten ibilbide hauek egiteko egoera fisiko onean egon beharra dago. Hori bai, esperientzia paregabea da.
Oinetako egokiak eta ura eraman behar dira. Inguru Babestua denez, bertoko animalia, landareak eta inguruko lasaitasuna zaindu behar dira. Norberaren zaborrak ere bueltan eraman behar dira.
